Ажил үүргийг зааглах

Аливаа алдаа, зохисгүй зүйлс гарах эрсдэлийг бууруулахын тулд гол үйл ажиллагааг өөр өөр хүмүүс хувааж хийх замаар ажил үүргийг заагладаг. Тухайлбал, үйлдвэрлэлийн явцад холбогдох хүмүүс зохих хяналтуудыг тавьсны үр дүнд хэрэглэгчдэд "ямар нэгэн асуудалгүй" бүтээгдэхүүн очих нь гарцаагүй.
Харин цөөн хүнтэй компаниудын хувьд гол үйл ажиллагааг нэг хүн хариуцдаг. Нэгэнт ажил үүргийг оновчтой зааглах боломжгүй бол өөр хяналтын ажиллагааг хэрэгжүүлэх хэрэгтэй. Дараах хяналтын ажиллагаанаас санаа аваарай:

• Ажлын гүйцэтгэлд хяналт тавих (жишээ нь, ажил дууссаны дараа баталгаажихаас өмнө эсвэл хэрэглэгчдэд хүрэхээс өмнө)
• Жилд нэг юмуу хэд хэдэн удаа хөндлөнгийн хүмүүсээр хянуулах (жишээ нь, аудит хийлгэх)
• Мэдээлэл ашиглан хяналт тавих (жишээ нь, үнийн судалгаа хийж байсан файл, бусад мэдээллийн сан бүхий файлуудыг ашиглах)

Камертай хэдий ч камер хянагч байхгүй газрууд яаж хулгай, зохисгүй үйлдлээс сэргийлэх вэ?

Хяналтын камер суурилуулах нь байгууллагын хөрөнгийг хулгайд алдахаас хамгаалах, ажилтнууд болон тэдний эд зүйлсийг хамгаалах, ажилтнуудын бүтээмжинд хяналт тавих, шаардлагатай сайжруулалт хийх, хэрэглэгчийн судалгаа, бүртгэл, видео архив хийхэд туслах, ажиллах хүчийг хэмнэх гэх мэт олон ач холбогдолтой. 

Камер хянагч байхгүй байгууллагууд “гэмт хэрэг” нэгэнт болсны дараа бичлэгийг нь үздэг. Уг нь ингэж сүүлд мэдээд бичлэгээ нөхөж үзэх биш, үйлдэл дээр нь таслан зогсоох нь чухал.
Ялангуяа ресторан, цайны газар, супермаркет, bakery зэрэг олон хүн үйлчлүүлдэг газруудын хувьд камер хянахгүйгээс болж, сард хэдий хэмжээний хохирол учирдгийг тооцоод, энэ нь камер хянагчид төлөх мөнгөнд дүйж очих, эсвэл давж байвал яаралтай камер хянагчтай болох хэрэгтэй.

КАМЕР ХЯНАГЧГҮЙ ТОХИОЛДОЛД ДООРХООС САНАА АВААРАЙ:

• КАМЕР ХЯНАХ АЖЛЫГ ХЭДЭН ХҮН ЭЭЛЖЛЭН ХАРИУЦАХ (Аюулгүй байдалтай холбоотой ажил хийдэг хүн байвал зүгээр. Жишээ нь, хамгаалагч, мэдээллийн аюулгүй байдлын ажилтан. Бүр болохгүй бол 2 ажилтнаа энэ чиглэлээр сургаад хэдэн өдрөөр ээлжлэн ажиллуулж болно. Ажлын хажуугаар үе үе камер харж байх тухай биш, тодорхой цагаар камер хянах компьютерийн өмнө сууж, шууд хяналт тавина гэсэн үг. Ийнхүү өөр ажлыг давхар хийж байгаа учраас тэдний үндсэн ажлыг нь бас оновчтой зохицуулах шаардлага гарна)
• ТАНАЙХ ОЛОН САЛБАРТАЙ БОЛ ТӨВ ДЭЭРЭЭ 1 КАМЕР ХЯНАГЧТАЙ БАЙХ
• ХҮН ИХТЭЙ ҮЕ БУЮУ ОРГИЛ ЦАГААР КАМЕР ХЯНАГЧ АЖИЛЛУУЛАХ
 • КАМЕРАА ТУХАЙ БҮР ХЯНАЖ БАЙХ ТЕХНОЛОГИЙН ӨӨР ГАРЦ ХАЙХ

Танай бизнест камерын хяналт өдөр бүр шаардлагатай байдаг бол хяналтгүй орхиж болохгүй.

Төсвийн тухай

Төсөв, гүйцэтгэлийг харьцуулж, дүн шинжилгээ хийх нь танай зорилтууд хэр биелснийг шалгах нэг төрлийн хяналт юм. Ирэх онд хэдий хэмжээний борлуулалттай байхаар таамаглаж байна вэ? Хямрал гээд хэт доогуур төсөвлөж болохгүй. Төсөвтэй холбоотой сануулах зүйл байна:

·         Төсвийг аль болох бодит хүлээлтэнд тулгуурлан боловсруулах нь чухал байдаг.

·         Үйл ажиллагааны болон санхүүгийн зорилтуудтайгаа уялдуулж, илүү нарийвчлан төсөвлөхийг хичээгээрэй.

Дотоод хяналт орших үндсэн шалтгаан бол компанийг эрхэм зорилгодоо хүрэхэд нь туслах явдал.

Гадаад орчны мэдээлэл олж авсан бол

Ажилтнууд компанидаа нөлөөлөх аливаа гадаад мэдээлэл олж авсан бол удирдлагадаа хэлэх хэрэгтэй. Энэ нь хууль, эдийн засгийн өөрчлөлт, компанид нөлөөлөх бусад гадаад хүчин зүйлс юм. Ингэснээр танайх тэрхүү эрсдэлийг давах боломжтой болно. Нөгөө талаас удирдлага ч гэсэн ажилтныхаа компаниа гэж бодож хэлсэн чухал мэдээллийг нь анхаарч сонсох хэрэгтэй.

Оновчтой шийдвэр гаргахын тулд ашиглаж буй мэдээлэл чухал

Та шийдвэр гаргахдаа ямар мэдээлэлд тулгуурладаг вэ? Тэдгээр мэдээлэл нь дараах шинж чанартай байвал илүү оновчтой шийдвэр гаргахад нөлөөлнө.  

Энэ хэрэгтэй мэдээлэл чинь мөн үү? 

Сүүлийн үеийн мэдээлэл мөн үү? (хугацааны хувьд тохирч байна уу?) 

Энэ мэдээлэл зөв үү? 

Танай ажилтнууд бүгд ижил ойлголттой болж чаддаг уу?

Удирдагч таны бусдад тайлбарлан ойлгуулах чадвар хэр вэ? Хүн бүрийн ойлгох, хүлээж авах чадвар харилцан адилгүй. Ажилтнууддаа үүрэг даалгавар өгөхдөө тэд бүгд ижил ойлгож чадсан эсэхийг анхаарч байх хэрэгтэй. Та тэдэнд юунд тэмүүлж, ямар үр дүн хүлээж буйг ойлгуулъя л гэвэл хоёр талаасаа маш сайн ойлголцох нь чухал. Сайн ойлгуулаагүй байж, янз бүрийн юм нэхэх, загнахаа урьтал болгох вий!